30.1.03
fimmtán-hundraðasti gesturinn kíkti inn á síðuna mína fyrir nokkrum mínútum síðan.Til hamingju Hafdís - já takk.
Það var að ég held einhver félagi minn úr háskólanum - nokkuð lukkuleg með það.
Það er æsispennandi könnun hérna hægra megin á síðunni. Hvet fólk til að kjósa - held að hún sé samt komin út í soldið mikið bull, en það er bara gaman að því.
posted @ 14:51
+ + +
Það er einhver að reyna að gleðja mig núna. Mjög margir hafa dundað sér við að kjósa oftar en einu sinni í könnuninni og ég get ekki annað en dáðst að þolinmæði þeirra. Ég hugsa að ég myndi ekki nenna þessu...enda ekki sú þolinmóðasta. Fyrsta vinnudeginum mínum fer senn að ljúka og ég held að hann hafi bara gengið vel hingað til. Búin að kynnast fullt af góðu fólki, man að vísu ekki alveg hvað allir heita en það lærist fljótt. Lukkulega er ég mjög glögg á nöfn. Pabbi ætlar að vera svo yndislegur að sækja mig og keyra mig í skólann! Ætlaði að keppa í langstökki á Reykjavíkurmótinu sem er í kvöld en þar sem ég get varla labbað vegna stífleika í hamnum (aftan á lærunum) veit ég ekki hvernig það fer!
Tala við ykkur seinna.
posted @ 12:45
+ + +
29.1.03
Gott að einhver nennti að kjósa 278x í nýju kosningunni minni. Ákvað nefnilega í gær að taka út þann kost að einungis væri hægt að kjósa einu sinni úr hverri tölvu. Margir kjósa nefnilega alltaf úr tölvunum í skólanum og lenda iðulega í því að geta ekki kosið þar sem einhver var þeim fyrri til. Ég er einstaklega ánægð með úrslitin eins og þau líta út núna - hef einmitt reynt að vera dugleg að æfa æðri endann síðust daga til að reyna að koma honum í eitthvað form.
Þetta er alla vega líflegasta kosningin hingað til. Þeir sem hugsa gott til glóðarinnar - eins og rassaaðdáendur - verða þó að hugga sig við það að það þarf að bíða í 5 mínútur á milli kosninga. Svo að einhver hefur verið mjög þolinmóður í dag....Takk fyrir það.
Ég ætla að drífa mig í heimanámið og æfingarnar.
over and out.
posted @ 22:38
+ + +
Gleðifréttir dagsins eru þær að ég var ráðin í vinnu í dag. Byrja að vinna hjá B&L, Bifreiðum og landbúnaðarvélum á morgun kl.9. Mér sýndist gæfukonan sem réð mig í vinnu hafa haft úr nokkrum umsóknum að velja svo að ég get greinilega komið vel fyrir þegar ég vanda mig. Það fyndna er að ég var ofsalega að vanda mig að vera ég sjálf í viðtalinu sem ég taldi að vísu að væri ekki vænlegt til afreka þar sem ég er óttaleg skellibjalla og bjöllusauður. Mamma heldur að ég hafi verið ráðin út af framkomunni, útlitinu og reynslunni af sambærilegum störfum - hverjum þykir sinn fugl fagur segi ég nú bara. Næst fer hún að hvetja mig til að skrá mig í Ungfrú Ísland eða eitthvað...
Ég var alla vega ofsalega hissa þegar hún bauð mér vinnuna í dag og ætla að standa mig ofsalega vel. Ég verð sem sagt að vinna frá 9-13 niðri í móttöku við að svara í símann - en það kann ég ofsalega vel, taka á móti fólki, stemma af í excel og taka á móti og skrifa póst - sem ég held að ég sé mjög dugleg í líka. Þetta starf er samt sagt næstum því sniðið eftir mér. Eftir vinnu dríf ég mig upp í skóla og tek til við lærdóminn. Ætla nefnilega að vera í 3 fögum með vinnunni. Rekstrarhagfræði II og Reikningshaldi II sem ég á eftir af fyrsta ári og Tjáningu og samskiptum sem er fag sem fær mig til að tala ennþá meira, skýrar en vonandi í styttra máli ; )
VEI, VEi Gleðidagur í dag....
Þar sem ég er búin að vera að skrifa þetta í svona tvær mínútur ætla ég að halda áfram að læra!
Fleira er ekki í þættinum í kvöld, veriði sæl.
posted @ 22:32
+ + +
28.1.03
Jæja, ný skoðanakönnun hefur litið dagsins ljós - ein af þeim fáu sem ég kem ekki til með að skipta mér af, kjósa né hafa áhrif á kjósendur. Minni en fremur á að úrslit þessarar kosningar geta haft veruleg áhrif á líf margra - vandið valið!
posted @ 13:42
+ + +
Skoðanir um pinnahæla voru margvíslegar og þótti dómnefnd undirrituð hafa haft of mikil áhrif á kjósendur. Mjög margir kusu alls ekki það sem þeim fannst og ætlar dómnefnd alfarið að taka fyrir það.
Hér koma niðurstöðurnar:
Hvað finnst þér um pinnahæla?
Tól djöfulsins (4) 23%
Svakalega óþægilegir (4) 23%
Ekki fyrir venjulegt fólk (3) 17%
Afar þægilegir (0) 0%
Einstaklega fallegir (4) 23%
Himneskir (2) 11%
Number of votes: 17.
posted @ 13:28
+ + +
27.1.03
Ég skellti mér í vísindaferð á föstudaginn. Viðskiptafræðinemar skelltu sér í Landssímann, sem var bara alveg ágætt. Nóg af áfengi og snittum og síðan fengum við öll gjöf sem mér finnst að sjálfsögðu alveg til fyrirmyndar. Ofsalega ánægð með þau í sambandi við það. Fyrirlestrarnir voru heldur langir og misskemmtilegir en ég hafði það þó af. Ég brást sjálfri mér gríðarlega og fékk mér bjór. Var mér hins vegar trú með því að vera komin heim fyrir 10. Astró sökkaði feitt og ég nennti ekki að hanga þar stundinni lengur. Einhverra hluta vegna var aðallega leiðinlegt fólk þar. Ég lét það þó ekkert á mig fá og hafði það bara gott heima, föndraði og var dugleg.
Ég þurfti að búa til kort fyrir mömmu sem tókst ekki betur en það að ég þurfti að gera 6 kort til að þau væru fullkominn. Þegar mamma kom til baka úr veislunni sagði hún mér að við hefðum klúðrar titlinum. Frændi minn var að útskrifast sem orkutæknifræðingur en ekki véltæknifræðingur eins og ég skrifaði skýrum stöfum FRAMAN Á KORTIÐ - mikið get ég verið klár. Mér til málsbóta get ég sagt að ekkert af okkur heima vissum þetta og munurinn á þessum fræðingum er víst voðalega lítill. Einhverjir nokkrir kúrsar, en hvað er það á milli vina.
Kveð að sinni,
posted @ 14:16
+ + +
Hef verið upptekin við að hanna síðu fyrir okkur vinkonurnar, en slóðin á hana verður ekki gefin upp - hernaðarleyndarmál þar að verki.
Ég vil annars byrja á því að blóta öllum karlmönnum sem hafa verið að reyna að skaprauna mér með því að kjósa akkúrat það sem ég vil ekki að sé kosið í könnunninni. Finnst þeir örgustu svikarar. Eins gott að Sigurjón hafi kosið RÉTT!
Veit fyrir víst að þeir sem standa mér nærst kusu að pinnahælar væru himneskir, þó að þeim finnist það alls ekki, bara til að fara í taugarnar á mér. Þar sem flestir hafa kosið að þeir séu himneskir tek ég það hér með fram að þessi könnun yfirgefur ekki síðuna fyrr en ég fæ mínu fram - og hana nú.
posted @ 14:11
+ + +
22.1.03
Ég gleymdi að segja ykkur frá því að það er eitt fag í Háskólanum sem gjörsamlega hannað eftir mínu höfði. Fór nefnilega í fyrsta tímann minn í tjáningu og samskiptum í seinustu viku og leist svona ljómandi vel á það. Þetta fag gengur út á það að tala, horfa í augun á fólki, tala, semja ræður, tala, læra líkamstjáningu og fleira í þeim dúr. Þeir sem þekkja mig vita að það að tala eru mínar ær og kýr - finnst fátt skemmtilegra og því held ég að ég eigi eftir að verða einstaklega dugleg að læra í þessum kúrs - efast samt um að ég þurfi að hafa mikið fyrir því.
Í fyrsta tímanum áttum við að muna nöfnin á öllum 20 einstaklingunum þarna inni og ég hafði ekki hitt neinn þeirra áður. Síðan áttum við að muna nöfnin og eitt orð sem hver valdi sér. Ég var í dáldið miklum vandræðum með að velja mér nafn en endaði að lokum með skellibjalla þar sem ég ákvað að það væri fallegra orð en brussa. Við áttum NB. að velja okkur orð sem líklegt væri að allir myndu eða tækju sérstaklega eftir. Flestir völdu sér kennileiti á sjálfa sig eins og gleraugu, brúneygður, freknur og annað álíka. Aðrir völdu sér orð eins og íþróttamaður, móðir, skófíkill og annað í þeim dúr. Ein stelpan sagðist vera fyndin og á einhvern hátt minnti hún mig á Árdísi vinkonu mína - fyrir utan þá staðreynd að hún reyndi ekki á neinn annan hátt að stela senunni. Sagði bara einn brandara sem er eitthvað sem Árdís hefði aldrei látið duga.
Fyrir næsta tíma á ég að skrifa kynningarræðu um konu sem ég talaði við í 10 mínútur. Mér fannst hún ekkert sérstaklega áhugaverð en verð einhvern veginn að gera hana það - held að ég verði samt ekkert í of miklum vandræðum með það.
Ætla að hunskast til að fá mér að borða og reyna svo að læra svolítið áður en ég fer á æfingu, segjum þetta gott að sinni.
posted @ 15:39
+ + +
Í gær fór ég í dæmatíma í rekstrarhagfræði II, á einhvern óskiljanlegan hátt var ég svo heppin að lenda á nokkuð myndarlegum kennara sem er menntaður hagfræðingur og er í BS í stærðfræði. Gallinn er bara sá að hann er e.t.v einum of klár fyrir okkur hin sem erum ekkert svakalega klár í rekstrarfræðunum. Ein eldri kona er sérstaklega ekki klár þar sem henni tókst á einhvern ótrúlegan hátt að misskilja eða barasta ekki skilja ALLT OG EKKERT í þessum tíma. Hún spurði spurninga á 2 mínútna fresti, en það er heldur pirrandi í 90 mínútna tíma, sér í lagi í ljósi þess að hún var bara að spyrja heimskulegra spurninga! Fyrst um sinn var þetta í lagi, síðan urðu menn pirraðir og í lokin voru allir farnir að hlægja að henni. Hún vissi til að mynda ekki að 0.2 er 1/5. Skildi ekki hvernig 0.2Y gátu allt í einu orðið að Y - kennarinn margfaldaði bara í gegn án þess að sýna það upp á töflu. Ég er hins vegar svo ÓTRÚLEGA þolinmóð að einstaklega heimskt fólk fer bara ALLS EKKI í taugarnar á mér. Ég skil hvers vegna viðskiptafræðin hefur slæmt orð á sér ef að meirihlutinn af nemendunum vita jafn lítið og þessi ágæta kona.
Mér finnst að sjálfsögðu gott og blessað að fólk fari aftur í skóla eftir margra ára hlé en mér finnst líka að það geti undirbúið sig á einhvern hátt áður. Byrjað á því að fara í kvöldskóla eða eitthvað.
Fyrir ykkur sem eruð að leita að huggulegum manni ráðlegg ég að mæta með mér í tíma í rekstrarhagfræði II ; ) Ef þið eruð nógu langt leiddar af hugfengni getið þið örugglega útilokað gáfukonuna.
posted @ 15:32
+ + +
Mér sýnist á öllu að SAUMÓZ vinkonur mínar hafi litið inn á síðuna mína. Alla vega hefur hlutfall þeirra sem fíla pinnahæla aukist til muna. Efast stórlega um að þjáningarsystrum mínum úr frjálsum þyki mikið til þeirra koma - nema e.t.v vilji Silju ofurskvísu.
posted @ 15:25
+ + +
21.1.03
Var að taka eftir stafsetningarvillu í spurningu vikunnar. Biðst hér með innilega afsökunar á henni og skil hvurs vegna svo fáir hafa tjáð sig um þar til gerða skó. Ég hélt að ég af öllum kynni að skrifa FINNST þar sem ég nota þetta orð - MJÖG MIKIÐ.
Biðst enn og aftur afsökunar.
posted @ 15:35
+ + +
Um helgina tókst mér einnig að útbúa lærdóms-aðstöðu í kjallaranum heima. Fyrir þau sem ekki vita býr 86 ára amma mín í kjallarnum. Kjallarinn er tveggja herbergja íbúð með fínu eldhúsi og sjónvarpshorni. Amma notar stofuna sína mjög lítið - eiginlega bara alls ekki neitt og því datt mér þetta snjallræði í hug. Þarna erum við með stóra stofu alveg út af fyrir okkur. Ég tók bara gamla eldhúsborðið okkar frá Vopnafirði og setti það inn í stofu og raðaði húsgögnunum upp á nýtt - voðalega lítið mál. Ég hef þann góða eiginleika að vera sérlega fljót að breyta og hef nokkuð gott auga fyrir breytingum. Herbergið mitt er til að mynda alltaf að breytast og breytingar liggja í loftinu núna. Fyrir þau ykkar sem vantar sérlegan stílista er ég í símaskránni. Tek voðalega lítið annað en ánægjuna fyrir...
posted @ 15:31
+ + +
Ég hef ekki verið neitt sérstaklega dugleg að skrifa inn á þessa síðu undanfarna daga sökum anna. Á föstudaginn var ég ofsalega dugleg við að gera voðalega lítið annað en að sofa. Laugardeginum eyddi ég hins vegar með brjálaða 2 og hálfs árs frænda mínum sem hefur orku á við nokkra ofvirka einstaklinga. Við notuðum nýja fína Bubbi byggir dótið sem hann fékk í jólagjöf til að laga alla hluti sem voru bilaðir heima - og það voru all nokkrir. Síðan hlupum við út um allt til að leita að kisu og vorum heil lengi í boltaleik. Eftir þetta var hann jafn sprækur en undirrituð orðin heldur þreytt - hafði ekki einu sinni orku til að fara á æfingu eftir þetta. Á laugardagskvöldið skellti ég mér síðan niður í bæ með vinkonum mínum, þeim tókst að hözzla eftir 1.5 sekúndur svo að mín hafði ekki mikla þolinmæði í að vera tvöfalt þriðja hjól.
Sunnudeginum eyddi ég í að starfa á Stórmóti ÍR sem er sko alveg jafn erfitt og að keppa. Sér í lagi þar sem mér tókst einhvern veginn að reka hausinn í á nokkra mínútna fresti. Rak hausinn í þegar ég fór inn í bíl og 3 mínútum seinna labbaði ég á grein. Þegar ég var að starfa við stangarstökk kvenna gerði Þórey Edda misheppnaða tilraun til að rota mig þegar ég fórnaði höndinni í að grípa slá á gífurlegri ferð og nokkru seinna reyndi Þráinn þjálfari að rota mig líka - ekki góður hausdagur hjá mér. Þegar mótinu lauk dunduðum við í meistaraflokki okkur við að taka til í höllinni sem er hægara sagt en gert þar sem tartanrúllurnar sem við vorum að bifast með eru nokkur hundruð kíló. Þessi hvíldardagur var sem sagt bara fínasta æfing.
4 íslandsmet litu dagsins ljós og hallarmet féll auk þess. Félagar mínir stóðu sig með stakri prýði og er ég einstaklega stolt af þeim. Við höfum ekki verið að einblína mikið á tækni í vetur og því er árangur þeirra eftirtektarverður. Þau voru líka alveg tvímælalaust lang flottust ; )
posted @ 15:26
+ + +
Rétt í þessu var gestur númer 1300 að kíkja á síðuna mína. Viðurkenni að ég er frekar lukkuleg með það ; )
posted @ 15:12
+ + +
17.1.03
Ég vil endilega að strákar tjái sig um pinnahæla, bara svo að þessar mega skvísur viti hvað þeim finnst um þá. Efast samt um að helmingurinn af ykkur viti hvurs lags skó ég er að tala um. Ekkert nema algjör sjálfseyðingarhvöt fær fólk til að festa þetta á lappirnar á sér.
Svona fyrir þau sem eru að fara að djamma í kvöld - ég hef hugsað mér að kíkja á Astór í kvöld með vinkonum mínum. Hef ekki hugsað mér að drekka áfengi í þeirri för sökum fátæktar - auk þess held ég barasta að ég sé hætt að drekka í óákveðinn tíma. Háskólastúdentar drekka hvort eð er minn skammt.
Hafið það gott um helgina og verið góð við hvort annað.
posted @ 17:07
+ + +
16.1.03
Vitið ekki hvað ég hef beðið lengi eftir þessu...
Held að ég þurfi að fá mér svona teljarakerfi á síðuna til að telja niður mánuði, daga og klukkutíma, mínútur og sekúndur þangað til. Held barasta að ég ætli að panta mér ensku útgáfu af bókinni svo að ég þurfi ekki að bíða ENNÞÁ LENGUR eftir íslenskri þýðingu.
Bestu fréttir sem ég hef heyrt LENGI! JEI!!!
posted @ 14:00
+ + +
Ég fór allt í einu að spá í það, hvað það er sem hvetur stelpur á öllum aldri til að ganga í PINNAHÆLASKÓM dagsdaglega. Ég hef aldrei getað skilið þetta þar sem ég er eins og belja á svelli þegar ég svo mikið sem reyni að fara í hælahá skó og hvað þá pinnahæla. Systir mín sem er að verða 15 ára á svona támjóa skvísuskó sem ég get bara alls ekki gengið á - það er varla hægt að halda jafnvægi á þessu. Ég get labbað á hælaskóm ef hælinn er almennilegur ekki einhver títiprjónn.
Ég fór að spá í þetta um daginn þegar ég sá skó sem vinkona mín keypti sér. Hún gekk á þeim í Kringlunni í nokkra tíma og var EÐLILEGA alveg búin í löppunum og öll út í blöðrum og sárum. Ég var alveg búin í löppunum eftir 3 tíma verlsunarferð í Smáralind um jólin en þó var ég í SLÉTTBOTNA skóm. Ég spurði nokkra stráka að því hvort þeim fyndist þetta flott og þeir sögðu mér að þeir tækju sjaldnast eftir skóm hjá stelpum. Vinkonur mínar sögðust í framhaldi af því ekki vera í svona skóm til að vera skvísur fyrir strákana heldur til þess að vera sætar fyrir sig og vinkonur sínar. Ég fyrir mitt leyti vil benda vinkonum mínum um allan heim á að ég met ykkur ekkert meira þó þið fórnið löppunum ykkur í svona skó dauðans heldur þvert á móti hvet ykkur til þess að hugsa um lappirnar á ykkur og vera í þægilegum skóm. Get skilið að þið séuð í svona þæglilegum pæjuskóm á djamminu en ekki í skólanum.
Ekki láta mig byrja á stelpum sem mæta uppáklæddar í skólann....
posted @ 12:09
+ + +
Gleymdi alveg að segja ykkur frá því að frjálsíþróttamenn ÍR voru valdir í seinustu viku. Titilinn eftirsótta hluta Einar Karl Hjartarson, hástökkvari og Vala Flosadóttir, stangastökkvar, kúluvarpari og hástökkvari með meiru en hún var jafnframt kosinn besti stökkvarinn. Í framhaldi af því voru efnilegustu unglingarnir kosnir. Tveir ungir og efnilegir strákar deildu öðrum titlinum með sér og Hildur Kristín Stefánsdóttir var efnilegust í flokki 18 ára og yngri. Albert Þór Magnússon þótti hafa sýnt mestu framfarir á árinu en það kom engum á óvart nema honum sjálfum sem var skemmtilega hræður og stoltur í senn. Unnsteinn Grétarsson var valinn besti hlauparinn en stigatöflu þurfti til að gera upp á milli manna. Unnsteinn hlaut flest stig fyrir 400m grindahlaup. Ég vil nota tækifærið og óska þessum fáu útvöldu innilega til hamingju.
Val þetta fór fram á aðalfundi frjálsíþróttadeildar ÍR fyrir árið 2001. Næsti aðalfundur verður haldinn í apríl á þessu ári.
posted @ 11:55
+ + +
Dagurinn minn byrjaði ekki vel í dag. Við ákváðum að sofa aðeins yfir okkur í morgun, ég hef varla sofið dúr seinustu 3 næturnar eða svo. Er alltaf að vakna og snúa mér í hringi. Á morgnana er ég yfirleitt búin að sofa það lítið að ég er voðalega lítið þreytt. Í morgun gat ég hins vegar aðeins lagt mig eftir að hafa slökkt á klukkunni kl.7. Ég vaknaði síðan ekki fyrr en 9.19 og sá þá að ég var orðin of sein í tíma (9.30) Ákvað stuttu seinna að fara á fætur og gera mig klára því að tíminn sem ég var að skrópa í var fyrsti sinnar tegundar á þessu ári og mig grunaði því að skráning í dæmatímana yrði fljótlega eftir tímann. Eftir á að hyggja fannst mér heldur sniðugt af mér að sofa lengur því ég gæti með þessu orðið á undan hinum krökkunum sem mættu í tímann til að skrá mig í dæmatíma niður í Odda. Ég var kominn niður í Odda kl.svona hálf ellefu en mér til mikillar skelfingar héngu blöðin ekki upp á töflunni og konan í afgreiðslunni vissi ekkert....Nú voru góð ráð dýr. Ég dreif mig í tölvu og sá að skráning í dæmatímana var í tímanum sjálfum. Auðvitað hálf hljóp ég út í Háskólabíó en greip í tómt - allir farnir. Ég fann einhverja stelpu sem ég veit að er í tíma með mér og spurði hana hvort hún vissi hvað kennarinn hafi ætlað að gera við blöðin. Hún vissi ekkert og sagði mér að kennarinn væri örugglega farin út í Odda. Ég ætlaði að rjúka aftur af stað þegar hún kallaði, þarna er hún. Ég talaði þá við þessa elsku sem skráði mig í eina tímann sem ég komst í samkvæmt stundatöflu -held að hún hafi vorkennt mér þar sem ég er eins og tómatur í framan - fór nefnilega í ljós í gær sem ég geri MJÖG SJALDAN. Þrátt fyrir að hafa lækkað andlitsljósin niður er ég MJÖG rauð í framan og finn til á heldur mörgum stöðum. Held barasta að ég ætli aldrei í ljós aftur. Hef reyndar mjög mikið á móti þeim þar sem svona geislar hafa bara þau áhrif að maður verður ennþá eldri og hrukkóttari þegar maður verður stór.
posted @ 11:50
+ + +
14.1.03
Fyrsti skóladagurinn rann upp bjartur og fagur í gær. Veturguðirnir ákváðu að vera ofsalega góðir við mig í tilefni dagsins og skelltu smá snjókomu og yndislegum kulda á landið. Gæti svo hugsað mér að búa út á Spáni eða einhvers staðar þar sem hitinn er yfir 0¨C Annars ætti ég ekki að kvarta, tíðarfarið hefur verið yndislegt í allan vetur - ef vetur skildi kalla.
Kom sjálfri mér heldur betur á óvart og var með 30 hæstu í stærðfræði - góð tilbreyting. Ykkur að segja fékk ég 8 og er alveg hæst ánægð með það - á Sveinbirni mest af því að þakka, hann er frábær kennari ; ) Lægsta einkunn í faginu var 0.0 sem ég hef ekki séð áður á mínum skólaferli - held að það sé gott. Hvernig er annars hægt að fá 0.0 á prófi. Viðkomandi hlýtur bara að hafa skrifað nafnið sitt og farið. Það voru líka nokkrir með 0.5!!!
Þessa önnina ætla ég að reyna að vera helmingi duglegri að læra en þá fyrri - þá læri ég eitthvað á hverjum degi...
Er alveg búin að fatta að sluxaskapur virkar ekki í Háskóla. Gleðifréttirnar eru þær að ég er bara í einu 6.5 fagi í ár - það þýðir að 5 dugir í öllu nema þessu eina þar sem nemendur þurfa að fá 6.5 til að standast prófið. Í 6.5 prófunum fyrir jól var 60% fall og aðeins 20% af þeim sem skráðu sig í fagið náðu því....
posted @ 15:32
+ + +
10.1.03
Hef haft svo mikið að gera við að sofa, taka til og æfa að ég hef barasta ekki haft neinn tíma til að tjá mig og þá er það sko slæmt... Ég get glatt ykkur með því að mér tókst að hoppa á miðvikudaginn, í fyrsta skipti í svona 10 mánuði, án þess að finna til í hnéinu - klöppum fyrir því. Enda fannst mér afspyrnu skemmtilegt á æfingu þrátt fyrir killer spretti sem lungun mín litlu þola ekki alveg. Man minn fífil fegri í þeim efnum, 5x4x60 með störtum á 30sek. fresti - ég veit að ég er aumingi!!
Ykkur að segja byrjar skólinn hjá mér á mánudaginn. Prófin hafa gengið upp og ofan, sum góð önnur ekki eins góð : )
Komst að vísu að því á æfingu í gær hvað er að fara með lappirnar á mér og snúa upp á mjaðmagrindina mína - er víst búin að taka CLEAN vitlaust í nokkur ár....Snillingurinn hann Sveinbjörn sem lærði CLEAN á þessu ári benti mér á þetta í gær og á hann þakkir skildar fyrir það. Skammaði hann að vísu fyrst þar sem ég þoli mjög illa gagnrýni...en núna er ég mjög þakklát!!!
Þarf að halda áfram með bílskúrinn....
posted @ 13:44
+ + +
6.1.03
Smá útilitsbreytingar á síðunni. Þetta er einungis tímabundið útlit. Bið ykkur að vera tilitssöm á meðan breytingar standa yfir - TAKK FYRIR.
posted @ 17:03
+ + +
Ég gerði mér lítið fyrir um helgina og brunaði upp í Brekkuskóg, sem er sumarbústaðasvæði rétt hjá Laugarvatni. Guðrún Inga vinkona mín var að halda upp á 21 árs afmælið sitt, átti reyndar afmæli 26. desember s.l. Þessi bústaður var af minni gerðinni, 2 svefnherbergi með rúm fyrir 5 og síðan svefnloft. Við vorum hins vegar 17 sem tróðum okkur þarna inn - þröngt mega sáttir sofa. Ég var reyndar ekki alveg sátt við vitleysinginn sem hraut alla nóttina og hélt þannig fyrir mér vöku. Hann svaf nefnilega niður í stofu en ég upp á svefnlofti. Þar af leiðandi gat ég ómögulega lamið hann - mjög brattur og leiðinlegur stigi frá loftinu ásamt 10 hausum á víð og dreif um loftið hindraði mig. Við dunduðum okkur við að spila Partý og Co allt kvöldið sem endaði reyndar með því að ég vann ekki, þó að mitt lið hafi verið að vinna allan tímann. Fyllibytturnar í mínu liði gáfust upp og vildu fara í pottinn - þau læra aldrei að það er lang best að leyfa mér að vinna svo að ég verði ekki tapsár og leiðinleg allt kvöldið. Var að vísu alveg sama þetta kvöld þar sem ég var búin að fá nett ógeð af spilinu. Annars var þetta bara mjög skemmtileg ferð enda mjög góður hópur. Mér finnst reyndar mun betra að sofa í mínu rúmi en á vindsæng í herbergi með 9 öðrum....
posted @ 14:57
+ + +
Fólk var ekki duglegt að uppljóstra jólamatnum sínum. Niðurstöður féllu þó á þessa leið:
Rjúpur 2
Hamborgarahryggur 6
Hangikjöt 2
Kalkúnn 4
Svín 2
Þetta gladdi mitt litla hjarta voðalega lítið þar sem aðeins einn borðar sama jólamat og ég - sem eru rjúpur. Reyndar borðum við líka rjúpur á áramótunum. Mér fannst rjúpur reyndar vondar fyrstu 14 ár ævi minnar en hef alfarið snúist í þeim efnum og finnst núna fátt betra. Ef ég borðaði ekki rjúpur myndi ég helst vilja fá lamb á jólunum þar sem mér finnst lambakjöt miklu betra en svínakjöt. Gæti að vísu vel hugsað mér að smakka kalkún einhvern tímann - fer ef til vill bara í heimsókn til Silju einhvern tímann og hún kennir mér að matbúa kalkún!
Ný könnun er kominn í loftið, hún er þó voðalega lítið spennandi þar sem mér datt ekkert spennandi í hug! Hvet ykkur samt til að kjósa, bara til að gleðja mig :)
Góðar stundir
posted @ 14:39
+ + +
1.1.03
Gleðilegt ár kæru vinir. Vona að árið 2002 hafi verið ykkur gott og að árið 2003 verði ykkur jafnvel enn betra.
Ég var búin að ákveða að vera ótrúlega stillt í gær og þar af leiðandi drakk ég bara eitt kampavínsglas móður minni til samlætis og síðan ekki söguna meir. Fór í fámennt en góðmennt partý með vinkonum mínum en var ekki í miklu partý stuði og fór því heim uppúr hálf fjögur. Held að ég hafi verið sofnuð fyrir klukkan 4 - ofsalega notalegt. Áramót í bænum jafnast bara ekkert á við áramót út á landi - komast ekki í hálfkvisti við þau einu sinni. Mig langaði helst að fagna árinu á Vopnafirði en vildi ekki ryðjast inn á einhvern af ættingjum mínum þar á þessum merku tímamótum. Reyni bara að draga foreldra mína þangað næsta ár og fagna áramótunum fyrir austan í faðmi fjöldskyldunnar ; )
Þakka ykkur fyrir að hafa séð ykkur fært að kíkja á síðuna mína á þessu ári - hún mun ganga í gegnum róttækar breytingar á næstu dögum og jafnvel skipta um nafn.
Njótið þess að vera í fríi og gera ALLS EKKI NEITT - þið eruð yndisleg.
posted @ 14:14
+ + +
