31.10.02
Úff, akkúrat þegar ég hélt að námsáætlunin mín væri skotheld klikkaði hún. Var svo á undan áætlun á sama tíma fyrir 24 tímum, núna er ég alveg nokkrum köflum á eftir áætlun og hver er ástæðan? Einfaldlega leti í undirritaðri. Netið, blöðin, sjónvarpið og maginn á mér voru barasta meira freistandi. Verð þar af leiðandi að vakna ELDSNEMMA á morgun til að læra. Þegar ég segi eldsnemma meina ég náttla svona rétt fyrir 10. Núna er klukkan nákvæmlega 11.52 og ég ekki einu sinni farin að undirbúa háttatíma. Verð að fara að snúa sólarhringnum við.
Í dag var seinni dagur æfingafrís, hann var unaðslegur. Svakalega gott að kúra inni undir teppi og horfa á sjónvarpið í staðinn fyrir að hýrast úti í þessum kulda. Það verður samt ljúft að fara á æfingu á morgun, hrista aðeins á sér spikið.
Ég er að fara í lagningu á morgun svo að áhugasamir vinir endilega takið eftir því, allir fá plús í kladdann sem taka eftir því og jafnvel eitthvað meira....
Fann fínan leik á tilverunni. Þeir sem vilja leika spænskan innflytenda á leið inn í Bandaríkin og á flótta frá löggunni - á reiðhjóli notabene endilega ýtið HÉR. Hafði að vísu ekki meiri þolinmæði en að ná 3000 og eitthvað stigum.
Gangi ykkur vel!
posted @ 23:58
+ + +
30.10.02
Ótrúlegt hvað maður getur eytt miklum tíma í þetta dót. Svona ykkur að segja er ég ekki fullkomlega ánægð með þetta ennþá enda þarf ég víst alltaf að vera fyrst og best í öllu. Held að ég hafi eitthvað breyst hvað það varðar...en alla vega.
Búin að lesa 6 kafla af 16, frekar gott dagsverk og reikna með 2 í viðbót áður en ég fæ mér fegurðarblund.
Var annars að komast að því í dag að fæ lengra jólafrí en ég hélt. Hætti 21.desember, sem mér finnst að vísu soldið seint, og byrja 13.janúar, sem mér finnst algjör snilld. Þannig að þeir sem vilja fá svakalega flotta jólagjöf frá mér sendi mér póst um að fá hana senda í janúar, hinum sem er alveg sama fá bara gjöf sem ég keypti á NO-TIME, þunn eftir jólaballið. Mæli með póstinum....
posted @ 19:12
+ + +
Búin að hafa svo mikið að gera, byrja held ég allar frásagnir á þessu, eins og vanalega lofa ég bót og betrun.
Setti inn gestabók og skoðanakönnun - hafði ekki meira ímyndunarafl en þetta í minni fyrstu.
Ef einhver góðhjartaður einstaklingur veit hvernig ég get komið íslenskum stöfum inn á þetta drasl má sá hinn sami endilega gefa mér upp leyniformúluna. Ég er nefnilega að klepra á þessu! Frekar fúlt að þurfa að skrifa hnein og taernar en þið verðið bara að sýna þolinmæði - ég er að læra.
Endilega skrifið mér eitthvað skemmtilegt í gestabókin. Ef þið viljið segja mér hvað má betur fara - endilega farið vel að mér. Er voðalega óþolinmóð þegar kemur að öllu svona. Vildi að ég hefði þolinmæðina hennar Bergrósar. Ennig vil ég þakka Sigurjóni fyrir að hafa hermt eftir Bergrós sem gerði mér kleift að herma eftir þeim báðum - takk bæði tvö.
Ótrúlegt en satt er ég að læra undir próf....
Catch you later...
posted @ 14:08
+ + +
23.10.02
Ji, ég er sko lítið meira en hneyskluð núna. Fór inn á bloggsíðu hjá stelpu í skólanum og sá þetta þar:
Áðan var ég að labba út í strætóskýli frá Vr2 og það var ógeðsleg fiskifýla.
Ég þoli ekki þegar það er fiskifýla úti, þá líður mér nefnielga alltaf eins og ég sé stödd í
einhverju sökkí sjávarplássi úti á landi...
posted by Edda Sif Aradóttir 15:20
Oh, my god segi ég nú bara. Borgarsnobb og leiðindi. Held að ég hafi bara misst allt álit mitt á þessari ungu snót með þessu.
Ég fann einmitt þennan fiskiILM þegar ég var að fara heim úr skólanum í gær og fékk alveg sælutilfinningu niður í tær - held að þetta sé bara ein af þægilegustu lyktum í heimi. Auk þess værum við Íslendingar ekki mikið ef að ,,sökkí sjávarplássin út á landi" myndu ekki framleiða fisk. Hvað gerir Edda litla borgarsnobb ef/þegar öll landsbyggðin verður komin til borgarinnar og þar með fiskurinn og fýlan líka? Gaman væri að vita það.
Held að ég geti bara aldrei horft framan í hana aftur.
Þeir sem eru sammála henni en langar að vera vinir mínir áfram skuli ekki minnast á það við mig að þetta sé vond lykt. Hinir sem vilja losna við mig vita hvað þeir eiga að gera...
posted @ 16:31
+ + +
22.10.02
Ekki er nú öll vitleysan eins:
Tekið af mbl.is:
Raðmorðinginn David Berkowitz, sem er þekktur undir nafninu Sonur Sams (Son of Sam), hefur skrifað bréf þar sem hann biður leyniskyttuna í Washington um að hætta árásum sínum á saklaust fólk. Leyniskyttan hefur skotið níu manns til bana og sært þrjá í Virginíuríki í Bandaríkjunum það sem af er þessum mánuði.
"Mér finnst ég hafa fundið reiði og heift þessa manns til löggæslunnar," segir Berkowitz m.a. í bréfinu sem er þrjár síður að lengd og skrifað í Sullivan öryggisfangelsinu. "Ég hef á tilfinningunni að þessi maður búi yfir mikil heift í garð FBI og annarra löggæsluaðila á þessu svæði og jafnvel gagnvart Bandaríkjastjórn í heild sinni."
Þá segist hann vonast til þess að leyniskyttan verði brátt handtekin. "Ég veit ekki hvort um er að ræða einn eða tvo aðila, hvort um er að ræða fársjúkan geðsjúkling eða hryðjuverkamann, jafnvel bandarískan hryðjuverkamann á borð við Timothy McVeigh," segir hann.
Berkowitz sendi bréfið til Ritu Cosby, sem fjallar um málefni Washington-svæðisins á Fox-sjónvarpsstöðinni eftir að hún leitaði álits hans á málinu.
Berkowitz, sem er 49 ára fyrrum starfsmaður póstþjónustunnar, myrti sex manns og særði sjö í New York á árunum 1976 og 1977. Hann var handtekinn eftir að hann fékk stöðumælasekt á síðasta árásarstaðnum og sagði við réttarhöldin að hundur nágrannans hefði skipað sér að myrða fólk.
Berkowitz er gyðingur en tók kristna trú árið 1987 og veitir nú föngum sem eiga við sálræn vandamál að stríða ráðgjöf. Þá aðstoðar hann blinda fanga í fangelsinu. Hann getur sótt um reynslulausn árið 2004.
Mér finnst frekar hart að dæmdur fjöldamorðingi sé að gagnrýna verk kollega síns. Ætli hann sé að passa að hann nái ekki að jafna töluna sína? Finnst líka soldið broslegt að maður sem segir að hundur nágrannans hafi skipað sér að myrða sex og særa sjö sé að hjálpa föngum sem eiga við sálræn vandamál að stríða. Hvað finnst ykkur?
E.t.v hefur hann orðið heill á geði þegar hann FRELSAÐIST! Væri alveg til í að hitta þennan geðsjúka hund!
posted @ 12:11
+ + +
21.10.02
Þetta finnst mér nú vera algjör snilld....
Hugsa að ég hafi bara verið kisa og sé í rauninni 3223 ára, þess vegna hleyp ég svona hægt, ég er svo gömul!
Tekið af mbl.is
Tómatsósurnar spænsku.
Spænsku systurnar þrjár, Lola, Lucia og Pilar Muños, sem mynda söngtríóið Las Ketchup segjast vera nokkur þúsund ára gamlar; Lola segist raunar vera 2500 ára, hafa endurfæðst oft og sé viss um að hún hafi verið fugl í einu af fyrri lífum sínum. Þá segir hún að Lucia systir sín sé 1765 ára gömul. Þessar spænsku systur, sem virðast samt allar vera á þrítugsaldri, eiga nú vinsælasta lagið í flestum löndum Evrópu: Aserejé.
Lagið, sem nýtur m.a. mikilla vinsælda hér á landi, hefur verið í efsta sæti á Spáni síðustu 14 vikur. Það er einnig í efsta sæti á sérstökum evrópskum vinsældalista og náði efsta sætinu í Bretlandi um helgina.
Stúlkurnar kalla sig Las Ketchup, eða Tómatsósan, og vilja með því heiðra föður sinn, Juan, sem kallaður var El Tomate og var frægur flamengógítarleikari á sínum tíma.
Nafn lagsins, Aserejé, er sagt vera hljóðlíking ensku orðanna I said a hip, en þannig hefst viðlag lagsins. Texti lagsins er einnig að mestu leyti merkingarlaus en það sem skilst virðist fjalla um ungan sígaunastrák, Diego, sem finnst gaman af að syngja og dansa en kann ekkert í ensku. Þess vegna reynir hann að líkja eftir orðunum sem hann heyrir.
Svo allir geti sungið viðlagið næst þegar lagið heyrist er það á þessa leið:
Aserejé
ja de
je be
jebe tu de jebere sebiunouva
majabi an de bugui an de buididipi
Kíkið á heimasíðu La Ketchup:
Áhugasamir geta fundið textann við lagið á heimasíðunni ;) JEI
posted @ 13:17
+ + +
Jæja, þá er prófatörninni næstum lokið. Á bara eftir að fara í stærðfræðipróf á miðvikudaginn og Rekstrarhagfræðipróf 2.nóvember - ég er sem sagt í fríi næsta laugardag ef einhvern fýsir að hitta mig!!!
Er alveg búin að komast að því að ég er ekkert svakalega flink að giska, náði þó að svara spurningu 11 í Þjóðhagfræði rétt með því að giska á 3, pabbi minn á nefnilega afmæli 11/3 - þakka guði fyrir það að hann fæddist ekki í apríl!
Annars hefur ekki margt drifið á daga mína. Fór í innflutningspartý á laugardaginn sem var svo rólegt að það drap niður allan hugsanlegan áhuga á að fara niður í bæ. Áður en ég fór þangað bauð mamma mér upp á freyðivín sem var nokkuð ljúfengt - mamma góða. Mér fannst spaugstofan alveg snilld, hló svakalega mikið. Síðan tók ég mér nokkuð langan tíma í að gera mig voða fína og sæta sem var síðan til lítils, var sofnuð fyrir kl.2. Er alveg svakalega lélegur djammari. Bæti jafnvel úr því um helgina þar sem ég ætla út að borða á Skólabrú - hlakka ekkert smá til. Reikna síðan fastlega með því að fara og tjútta smá eftir það - nenni ekki að klæða mig oft uppá til að gera ekki neitt.
posted @ 13:12
+ + +
16.10.02
Hef alveg engan tíma til að segja eitthvað sniðugt í þessari viku. Er nefnilega að fara í próf í stjórnun og þar sem ég er svo lítið stjórnsöm verð ég að læra á fullu. Er líka búin að vera svo mikill sluxi síðustu vikurnar. Þarf að lesa 10 langa kafla á 3 dögum auk þess að skila massívu verkefni á föstudaginn.
Læt heyra í mér við betra tækifæri.
Góðar stundir...
posted @ 13:33
+ + +
12.10.02
Þjóðhagfræði, smjóðhagfræði segi ég nú bara. Var alveg svakalega klár í vergri landsframleiðslu, hreinni þjóðarframleiðslu og neysluvöruverðs vísitölunni ÁÐUR en ég fór í prófið. Mér fannst ekki mikið mál að reikna verga þjóðarframleiðslu á verðlagi annars árs - þangað til að ég kom í prófið. Er alveg búin að finna það út að ég og krossapróf eigum ekki saman. Mín var svakalega flink og skrifaði alltaf niður svarið við spurningunni áður en hún kíkt á valmöguleikana þar sem það var hægt, en allt kom fyrir ekki. Þegar einn valmöguleiki átti að vera rangur fannst mér að tveir gætu hæglega verið það - svona er ég vitlaus og neinu misjöfnu upp á neinn. Það er þó einn ljós punktur í þessu öllu saman - þetta gilti bara 20% til hækkunar. Já, svo má nú ekki gleyma hinu öllum 6 partýunum sem ég er að að fara í kvöld - já, eitt er bara strákapartý sem ég er víst ekki gjaldgeng í ;(
Verð víst að fara að gera mig klára, er búin að glata náttúrulegu fegurðinni - held að ég hafi farið svo illa með hana. Núna þarf ég að spasla og laga...
Sjáumst á djamminu : )
posted @ 18:40
+ + +
11.10.02
ÚFF, svakalega prófatíð. Eins og þið líklega vitið var ég í stærðfræðiprófi á miðvikudaginn og er núna á fullu að læra fyrir þjóðhagfræðipróf sem er á morgun. Á sem betur fer bara eftir 2 kafla - frekar dugleg. Annars er dagskráin þéttskipuð hjá mér á morgun. Fer í próf frá 2-4 síðan í búð að kaupa gjafir handa öllum sem buðu mér í afmæli eða innflutningspartý. Mér er nefninlega boðið í 7 afmæli/veislur/partý á morgun. Þar sem ég er algjör aumingi reikna ég ekki með að afkasta þetta allt og ætla að svíkja svona 2-3 veislur. Fjárhagurinn segir mér að svíkja alla þá sem krefjast einhvers konar gjafa en samviskan leyfir það ekki. Þau teiti sem bjóða upp á áfengi komast einnig ofarlega á listann - ég verð sem sagt hress á morgun :)
Jæja, nú verð ég barasta að fara að læra aftur....
posted @ 15:30
+ + +
9.10.02
Ég var í stærðfræðiprófi áðan. Var búin að vera svona líka dugleg að læra fyrir það. Síðan kom bara í ljós í prófinu að allir notuðu gögn í prófinu nema hún litla ég. Mín dreif þá bara stærðfræðibókina upp á borðið og fór yfir dæmin. Held barasta að ég hafi bara gert eina fljótfærnis vitleysu í dag - frekar gott.
Er að fara í tíma...
posted @ 16:54
+ + +
Vá, ég er orðin 258 mánaða, 1127 vikna og 7892 daga gömul - pælið í því. I´m OLD. Ef þið viljið sjá hvað þið eruð orðin gömul eða hvað það er langt í næsta afmæli þá reiknið þið það út hér Svona til að minna ykkur á það eru bara 143 dagar þangað til að ég á næst afmæli - úff mig er strax farið að kvíða fyrir.
posted @ 16:52
+ + +
8.10.02
Jæja, góðir hálsar.
Mér gekk ekki alveg nógu vel að láta tripod virka eins og ég vildi láta það virka svo að ég ákvað að herma eftir Bergrós og prófa þetta kerfi. Var frekar fúl með tripod þar sem það vildi ekki setja inn tímasetningar á póstana mína. Ætla að reyna að fá þetta til að virka - eins gott að það geri það.
Læt þetta duga í bili þar sem ég er enn að fikta. Að ganni setti ég seinustu pósta af tripod hérna fyrir neðan svo að þið getið notið þess að lesa þá....
Þangað til næst....
posted @ 12:37
+ + +
2.október 2002
Jæja, jæja. Nú hefur ekki margt spennandi drifið á mína daga. Ég er bara að læra, æfa, sofa og borða - meira að segja helst til of mikið því kílóin hrannast upp þegar þau eiga að vera að RENNA AF. Ekki nógu gott. Samt hefur mín hvorki borðað neitt sem heitir sælgæti eða drukkið gos í tæplega 2 vikur. Það besta er að hana langar meira að segja alls ekkert í nammi - svakalega stolt af mér. Týpíkst fyrir mig að þyngjast og fitna þegar ég er að reyna að léttast og verða svaðaleg gella. Glöggir lesendur tóku eftir svaðalegri bumbumynd af mér - í maí á næsta ári stefni ég að því að vera með innfallinn maga, eða svona allt að því ;)
Aðal umhugsunarefni mitt þessa dagana er þó hvort ég eigi að skella mér í vísindaferð á föstudaginn og þá hvort ég eigi að fara með viðskiptafræðiliðinu eða verkfræðinördunum. Það eru nefnilega fáir skráðir í vísindaferðina hans Sveinbjörns og því ætti ég að vera góð kærasta og auka hróður hans með því að mæta og láta líta út fyrir að það sé fullt í stað þess að djamma með hinum. Hins vegar langar mig miklu meira í ACO-Tæknival heldur en í Danfoss - held að flestir skilji afhverju. Auk þess held ég að fyrirlesturinn í A-T verði meira á mínu áhugasviði en Danfoss. Held að mér finnist skemmtilegra að hlusta á tölu um slæmt gengi og erfiðleika á markaðnum heldur en einhvern fyrirlestur um rör og tengingar og bla...
Sjáum bara til hvað ég ákveð - ég læt ykkur vita í tíma svo að þið getið hagað ykkar plönum eftir því :)
Ég var að sjá restina af SVAÐALEGU myndunum af mér í dag, þær reyndust alls ekki vera svo svaðalegar - fannst þær alla vega aðeins skárri en hinar ( og þá er ég eiginlega bara að tala um brjósta-og bumbumyndirnar). Það var að vísu ein mynd af rassinum á mér sem hindrar mig í að gefa linkinn upp - leiðinlegt fyrir ykkur. Mér til mikilla ama ganga einhverjar myndir af mér milli manna - held að það sé gera-grín-að-Hafdísi-dagar. Það gengur hins vegar yfir fljótt - vona ég.
Ég er að deyja úr þreytu eftir æfinguna í dag. Hlupum bara eitthvað endalaust og þegar þjálfi var endanlega búinn að drepa okkur Sveinbjörn, tók bara meira við. Skranans vandræði. Stundaskráin mín er nefnilega þannig að ég er í dæmatímum í þjóðhagfræði og rekstrarhagfræði aðra hverja viku. Aðra vikuna er ég til 18.45 en hina til 20.20 - sem að leiðir að verkum að ég get ekki mætt á æfingu þessa daga. Mér datt hins vegar í hug að vera svakalega dugleg og taka bara báða tímana á sama degi - ég er svo góð. Þetta leiðir það að verkum að ég get mætt á æfingar annan hvern miðvikudag, hinn hvern dreg ég bara Sveinbjörn með mér á æfingu í hádeginu - eða hann dregur mig réttara sagt. Þó að mín sé í ströngu átaki kemur letihaugurinn og sérhlýfnipúkinn oft upp í henni.
Núna ætla ég að fara að fá mér fegurðarblund...
28. September 2002
Eins og ég greindi frá í gær, voru misfallegar myndir teknar af mér í fyrstu vísindaferðinni minni. Hérna má sjá mig belgja út magann eins og mér einni er lagið. Held að það leiki ekki nokkur vafi á því að ég sé ólétt - hélt alltaf að ég myndi taka mig vel út með bumbu, en held að þessi mynd sanni að ég hafði MJÖG SVO rangt fyrir mér. Dæmi hver fyrir sig...
27.September, 2002
Úff, ég hreinlega skammast mín. Hef ekki skrifað neitt síðan ég byrjaði í skólanum. Vildi að ég gæti sagt að það sé vegna þess að ég sé svo dugleg að læra, en sú er víst ekki raunin. Held að ég sé einmitt allt annað en dugleg. Dundaði mér við það í dag að gera skussalista yfir allt sem ég ætti eftir að gera, varð örlítið of langur svo að ég ákvað bara að best væri að hvíla sig soldið áður en ég legði af stað í ferðina endalausu - það er að segja að því að vera á réttum stað í ÖLLUM greinum.
Annars er það helst að frétta að ég fór í FYRSTU vísindaferðina mína fyrir viku - brjálað stuð í EUROPAY, þeir eru svo sannarlega höfðingjar heim að sækja. Það versta var að einhver gæji tók ENDALAUSAR myndir af mér, sem líta það misvel út að ég segi ykkur ekki einu sinni slóðina. Þar er til að mynda hægt að finna mynd af mér með magann út þaninn - var að sýna strákunum hvað ég gæti gert mig feita og kvikindið tók mynd. Hann tók líka brjóstamynd af mér - hve fyndið er það. ÉG ER EKKI EINU SINNI MEÐ MEÐALSTÓR BRJÓST, alla vega ekki neitt til að taka mynd af. Síðan sýndi hann öllum strákunum myndina voða stoltur! Ég þurfti nú alveg að hemja mig þá - hefði barasta geta dáið úr hlátri. Er meira að segja búin að sjá myndina og finnst ekki mikið varið í hana - þó ég segi sjálf frá.
Var að fatta áðan að dótið sem ég skrifaði inn í ágúst uppfærðist ekki með síðunni. Svo að áhugasamir geta lesið einhverjar hugleiðingar síðan í ágúst. HEPPNIR ÞEIR.
Annars þarf ég að hunskast til að lesa einn af FIMMTÍU köflum sem ég á eftir, svo að ég bið að heilsa í bili - LATER.
Hef verið alveg svakalega léleg að uppfæra undanfarið. Kenni vinnunni um...í fyrsta skipti í allt sumar hafði ég alveg svakalega mikið að gera. Svo mikið að ég gat ekki einu sinni skrifað neitt hér...og þá er það svart!
Að vísu hefur ekki mikið markvert drifið á mína daga undanfarið. Fékk þessa líka leiðinda pest strax eftir verslunarmannahelgi og er bara rétt að hressast núna. Var á tímabili þegjandi hás sem er u.þ.b það versta sem ég get hugsað mér. Fór meira að segja í Saumaklúbb a.k.a kjaftaklúbb og gat varla talað. Hefur sjaldan liðið jafn illa. Gat næstum því ímyndað mér hvernig málleysingjum leið.
Annars stóð ég mig best í því að vakna alltaf kl.3 á næturnar með hóstakast og vekja allt húsið - gefum mér gott klapp. Tilitsama ég...
2.ágúst 2002.
Risin úr rekkju. Var hundlasin í gær og gat voðalega lítið gert. Var svo óglatt að ég gat varla hreyft mig. Gat ekki einu sinni notið þess að vera veik í góðu veðri og sóla mig - og þá er það slæmt. Er öllu betri í dag en langt því frá að vera góð! Tilhugsunin um að vera að fara upp í bústað eftir vinnu hressir, bætir og kætir. Hlakka ekkert smá til að komast aðeins í burtu. Við skötuhjúin sýndum hörku í gærkvöldi og þrifum bílinn OKKAR - er víst okkar bíll þegar hann er skítugur. Í dag er þetta sem sagt bílinn hans Sveinbjörns - góð skipti það. Síðan tróð ég einhverju ofan í tösku - ekki alveg með á hreinu hvað það er - mér til afsökunar var ég með óráði í gær. Sýndi samt hörku og mætti í vinnuna í dag, þrátt fyrir slen. Sló þar með helminginn af starfsfólkinu út því það eru næstum allir í fríi í dag - lata fólk.
Við Sveinbjörn verðum annars í svaka keppni í dag við samferðarfólk okkar um að ná svefnherberginu. Það er nefnilega bara eitt svefnherbergi og svo kojur - við sættum okkur náttla ekki við svoleiðis óþvera og heimtum rúmið. Eins og staðan er í dag fær ekkert skákað rökunum mínum. Við erum stærst og feitust og þurfum því stærsta rúmið. Við erum stóru og góðu vön og sættum okkur ekki við minna. Annars er ég sterkust svo að þau hin þora ekkert að mótmæla þessu þegar ég hólminn er komið.
Ég óska öllum góðrar skemmtunar um helgina og vona að aðrir skemmti sér jafn vel og ég ætla að gera....
posted @ 12:33
+ + +
